Табиблар баланың күзенә кадалган талпанны алган

Өстәвенә, күз табибларына ике балага – биш һәм өч яшьлек сабыйларга ярдәм итәргә туры килгән. Аларның берсенә талпан авылда кадалган, икенче балага – бакча ширкәтендә ияргән. 

«Беренче очракта – көйсезләнгән, күзендә чит әйбер булуга һәм авыртуга зарланган баланы әти-әнисе алып килгән. Табиб баланың күзен караган вакытта күз кабагының өске өлешендәге эчке конъюнктивына кадалган талпанны ачыклаган», – дип билгеләп үттеләр Кама балалар медицина үзәгендә.

Икенче сабыйның әти-әниләре талпанны күз кабагында үзләре күргән һәм медицина белгечләренә мөрәҗәгать иткән.

Офтальмологлар талпанны сак кына тартып алып, ул урынны эшкәрткәннәр, травмпунктта балаларга иммуноглобулинлы профилактика үткәргәннәр. Кечкенә пациентларның сәламәтлеген поликлиникада күзәтеп торачаклар.

Чыганак: https://tatar-inform.tatar/news/callyda-tabiblar-ike-balanyn-kuzlarena-kadalgan-talpannarny-algan-5858012